健康精英直路賽掂

猪拉多纳

　　根據阿棟嘅經驗，近年周末跑馬時有危機，唔係講人馬安全嗰瓣，而係賽果通常會開「冷氣」，今日對於一啲重飛馬，切忌太過熱情。所以，今期品題嘅「健康精英」、「自由萬歲」及「勁闖駒」，都唔係一面倒大熱門馬。

　　第三場四班1000米。「健康精英」前仗初出跑谷草1000米，臨場賭到3倍幾，跑落卻另一回事，冇段好睇都不特止，隻馬連彎都未識轉，逢喺彎位就「波勾」，成熟程度可知。亦可能因為呢個緣故，阿苗上場安排此駒轉戰直路賽，接戰跑獲季軍，全程走勢明顯比前仗順得多，睇嚟現階段集中跑此程有好冇壞。寄望呢匹質新馬跑過1場略有進步，便有出頭機會。

　　第六場三班1400米。「自由萬歲」初出表現不濟，翌仗除晒啲配備，演出卻完全唔同，雖然不敵「紅山茶」，佢都可以拋開第三名「香檳歲月」，呢個第二名唔係冇水準。今仗續跑1400米，整體對手級數明顯不如上賽，哪有「紅山茶」之輩，從而令牠的爭勝機會增加。再者，呢場唔多馬會搶，對於跑法機動嘅佢，形勢一片大好。

　　第八場三班1000米。「勁闖駒」直路賽專家，跑5場得2冠1亞1季，賽績準得可愛。而上賽在谷草1000米也入Q，看來經過1場實戰後，狀態即到位，既然具備佳態，冇理由要喺谷草玩檔位抽獎，不如重返強項，所以，今仗肯轉程，必有爭出頭決心。

點買法

　　兩件熱門「自由萬歲」及「勁闖駒」，勝在跑法及路程性能可取，博W揀佢哋。而「健康精英」一換人賠率冷晒，反而仲有得博，一於用嚟做膽，腳拖１　５　７　１３。

資深評馬人　陳華棟