貝迪斯慌張期明醒馬拉加

猪拉多纳

05/11/2011
文： 山度士

要數近況最沉嘅西甲球隊，肯定非貝迪斯莫屬，呢支升班馬季初一鳴驚人成為「神奇球隊」，勢估唔到被破金身之後，即如洩氣皮球一沉不起，聯賽連輸六場。度士都係踢波出身，個人認為貝迪斯正處於一個「慌張期」，球員愈想贏波就愈踢唔出水準，所以今輪聯賽對馬拉加，好大可能會延續敗仗。




（now 632周日凌晨3時直播）


六連敗要心理輔導


正所謂起得快，跌得更快！季初威風凜凜，頭四場聯賽全勝嘅貝迪斯，近六場聯賽竟然全部輸晒，直情好似玩緊跳樓機咁由最高點急跌落地面。雖然貝迪斯係一支擁有悠久歷史嘅傳統西班牙球會，但畢竟係一支升班馬，遇上咁嘅情況，好多球員仍未接受得到，落場自然踢得患得患失，背負咁大壓力下，點會踢出水準。




若然度士係貝迪斯教練，首要工作唔係責怪球員，而係要同佢哋作心理輔導，讓佢哋放輕鬆比賽，而且目標亦唔一定係贏波，最重要係先止血求不敗，等班球員有番信心先再搶三分。當然，恢復信心並非一時三刻嘅事，所以貝迪斯今輪要對馬拉加，度士就唔認為佢哋可以佔上優勢。




再者貝迪斯今場亦陣容不整，兩名中前場主力辛達告魯斯及莫姆都因傷缺陣，而安東尼奧艾美亞則因傷上陣成疑，反觀馬拉加傷兵唔多，個人睇好客隊可攞三分。




前香港足球先生，畀料同佢做人一樣，百足咁多爪，對唔同聯賽都有興趣。教波同貼波，一樣做阿哥。