曼聯開P捉黑貓做賀禮

猪拉多纳

05/11/2011
文： 朱楓

今晚曼聯主場奧脫福會舉行「銀禧派對」，慶祝領隊費格遜率領紅魔25周年！近期改打中場有Sharp醒表現嘅朗尼、上位箭頭查維亞靴南迪斯等人，肯定會搏命捉「黑貓」當賀禮！紅魔出身嘅新特蘭領隊布魯士亦係費Sir愛徒，斷估唔會搞寸個P，捧曼聯1.52倍「讓球主勝」啦！




（有線200及300、廣東體育周六晚11:00直播）


大佬維迪復出鎮住防線


費格遜能夠帶領曼聯傲視英超25年，朱楓覺得其中一個原因，就係佢好識處理危機。早前紅魔主場歷史性慘敗畀死敵曼城，全世界都認為紅魔有排衰，點知費爵爺喺上場英超突然搵朗尼客串中場，將查維亞靴南迪斯擺番出嚟，效果竟然出奇地好，日前喺歐聯照辦煮碗又贏多鋪，真係唔到你唔服費Sir嘅膽識同功力。




今晚曼聯主場對新特蘭，正正係費格遜入主紅魔25周年嘅大好日子，一班球員肯定會加多兩錢肉緊，生擒「黑貓」當做賀禮，今戰仲有隊長、首席中堅尼曼查維迪復出，要實現呢個目標話都冇咁易。


新特蘭領隊係費Sir愛徒


最緊要嘅，係「黑貓」新特蘭近年被形容為曼聯二隊，經常收留紅魔棄將，好似今場咁，就有領隊布魯士、後衞巴士利、布朗同基蘭李察臣倒戈，本來奧沙都係其中之一，可惜佢上場對維拉受傷，今仗極大機會缺陣。查實新特蘭之所以能夠用平價買咁多紅魔球員，好大程度係因為兩軍主帥Friend到震，斷估領隊布魯士今晚唔敢亂嚟，搞寸恩師兼「米飯班主」個Party啩？




好，就當撇除所有陰謀論，當新特蘭今鋪會搏到盡，但佢哋近年對親曼聯都冇運行，對上18次英超交手，竟然只得5和13負劣績，近9戰仲有7次食白果，對上一次作客贏曼聯，已經係1968年咸豐年代嘅事，加上除咗上文提及嘅奧沙之外，正選門將米洛列特又喺賽前話爆鼻，復出遙遙無期，今晚焗住要用名不見經傳嘅基倫韋斯活特擔正，提升18歲嘅賓威爾遜做後備門將，條防線真係聽見都牙煙。今晚作客奧脫福，擺低3分當賀禮啦！

橫數千軍

曼聯挑戰主場900分

‧近18次喺英超交手13勝5和。

‧贏波就會成英超首支喺主場累積突破900分嘅球隊。

新特蘭對賽例食白果

‧近9次交手有7次食白果。

‧自08年4月後，只曾2次於英超錄得作客2連勝。