保亞斯重攻輕守玩殘兩閘

猪拉多纳

05/11/2011
文： 江忠德

「進攻就係最佳嘅防守」，呢套戰術理念喺葡超可以大派用場，但喺英超就絕對行唔通，好似車路士連對三流球隊亨克都要失波，防守核心泰利又遇信心危機，今晚作客布力般流浪有分落袋已經收貨，咪講話要大炒！




保亞斯年少氣盛，帶波圖嗰陣幾乎鋪鋪盡炒對手，佢麾下最辛苦係兩閘，人地做後衞大部分時間安守本分，有機會先至上前助攻以翼鋒姿態出現，但保亞斯要艾殊利高爾同保辛華成場波不停上上落落，真係鐵人都散啦！最明顯係每當比賽後段，兩閘體力下降就出現漏洞，亦解釋咗車仔10場聯賽有9場失波嘅因由。


狼隊韋根攻「細」欠奉


布力般今季一直沉淪，搞到球迷遊行要求炒領隊堅恩，好在幾個老將出面撐主帥，上場就搏甩髀踢和諾域治。弱隊護級就係靠主場搶得1分得1分，前仆後繼唔畀車仔喺佢哋主場瀟灑走一回！




至於聽晚有場由狼隊對韋根，兩隊搞到要護級，主要係前線欠銳利所致，大家都唔敢輕舉妄動，睇定形「細」伺機而動啦！