老列納因住心臟病復發

猪拉多纳

06/11/2011
文： 麥馬拿仁

雖然夏利列納死撐話自己心臟冇事，但拿仁就勸該名熱刺領隊乖乖哋抖吓，今晚英超熱刺作客富咸，佢老人家捱唔住過山車入波嘅場面，都係瞌埋眼咪睇，轉個頭又要返入醫院就唔好啦！近期富咸幾名攻擊手安祖莊臣、森莫亞同杜夫個個都弗爆，射門吓吓靚、吓吓入，今戰一於捧1.85倍大！　（有線200及300台周一凌晨零時直播）


身子要緊咪睇直播


夏利列納今年已經64歲，佢老人家一向好注重健康，仲周時喺屋企踩健身單車。早前佢踩唔夠2分鐘，就覺得心臟隱隱作痛，佢即時唔敢再運動，拿拿臨返球會睇軍醫。經專家Check過之後，發覺佢心臟動脈有閉塞迹象，所以必須做手術，上周中歐霸盃熱刺作客魯賓卡山，佢都未能隨隊督師，結果熱刺嗰場輸咗0:1。




依家夏利叔已出咗院，佢話自己冇乜事，抖幾個禮拜佢就會歸隊。老列納年紀一把，為咗健康一定要抖，拿仁勸佢休息一定要徹底，今場都係唔好睇直播喇，因為熱刺條防線今場肯定備受考驗！


雙方前鋒個個弗爆


前幾日歐霸盃賽事，富咸主場鬥克拉科夫，對手都唔係魚腩，但富咸班射手個個弗爆，於前線配合絲絲入扣，其中ＡＪ（安祖莊臣）最Sharp醒，第一時間窩利抽入嘅世界波令人印象難忘，而杜夫左右竄擾、森莫亞衝鋒陷陣亦充滿威力，個個起晒Q，加埋喺主場福地出擊，真係唔係人咁品！




富咸勁，熱刺當然亦唔弱，上周中歐霸輸波只因多派二線兵出戰，挾近7場聯賽贏咗6場嘅威勢，加里夫巴利、雲達華治、莫迪歷、迪科爾全部已磨拳擦掌，今戰啲入波分分鐘梅花間竹，老列納唔想心臟又出事，早啲上床瞓覺好過嘞！