史篤城空中最強炸散殘廢保頓

猪拉多纳

06/11/2011
文： Yennie

假如要喺英超搵支最令人失望嘅球隊，我諗一定係保頓啦！佢哋今季聯賽10戰輸足8場，反觀近季進步良多嘅史篤城一向都係信心保證，前幾日歐霸作客仲贏埋波添，今晚佢哋面對殘陣嘅保頓，我諗史篤城唔難小勝。保頓讓平半，史篤城個1.8倍下盤夠晒穩陣！




保頓今季真係黑到冇朋友，一開季就有主力李青龍長抖，主將賀頓又話重創，美亞斯同森歷格斯等都輪流受傷，搞到成日都唔齊腳。最慘係上季嘅首席射手艾文達離隊，史杜列治返車仔，想入波竟然要靠表現飄忽嘅卡斯歷同尼高治，鋒力咁弱，仲點會有好成績吖！


保頓防線10戰失27球


保頓除咗攻不銳，防線仲要勁不穩！開季10戰失27球，係全英超最多！梗係啦，條後防踢嚟踢去都係靠加利卡希爾同加特拿孭飛，今仗加特拿仲要坐波監添，你估加利卡希爾真係葉問，1個打10個咩？




對家史篤城今季要兼顧埋歐戰，不過整體戰績都唔差喎，雖然話聯賽盃出局，但聯賽位列中游，歐霸盃仲喺小組做埋一哥添，夠晒堅！呢支靠賣「手榴彈」起家嘅球隊，真係堪稱空中最強，今季仲有埋前熱刺射手高治加盟，件件都過6呎，唔打得都嚇得啦！今戰對保頓莫講話要保持不敗開下盤，分分鐘贏埋都唔奇㗎！




Yennie心水 史篤城（下盤）




半隻腳踩咗入靚模界，但最後決定以學業為重。如今畢業在即捲土重來，希望大家支持。外國波、本地波都係佢「飛佛」。

微博傳情 \(^O^)/

除咗返學，其實每星期我都會返兼職做電話推廣員賺取生活費。公司有位同事要調舖，上星期日係last day，依位同事除咗係我阿哥嘅好兄弟，仲係我契大佬：阿宏！阿宏為公司拚搏多年，係一位好資深嘅Team Leader，人人都叫佢做宏師兄。上星期日放工嗰陣已經係12點幾，但電話部有九成同事出席阿宏嘅Farewell Dinner，就知阿宏幾受歡迎啦！當晚飯局大家都好盡興，大家仲夾份送咗隻錶畀佢，希望佢調舖之後，每當睇時間嗰一刻，都會諗起我哋呢班兄弟姊妹啦！