敲沙士菲2.85倍和尋「保」

猪拉多纳

06/11/2011
文： BlackJack

阿甲春剩低6輪，帶頭嘅小保加領先打多場嘅拉費爾拿成9分，人人都覺得佢哋攞硬冠軍。正因為咁，今日佢哋作客對沙士菲，大把本錢失分，不妨用個2.85倍嘅沙士菲和，過落去鳥棲砂岩半場勝，同埋德島漩渦個主W度。




小保加贏梗今季阿甲春季聯賽，可以說係當地球圈嘅一致睇法，呢支班霸嘅人又點睇呢？教練費斯安尼話佢哋冇人覺得攞硬，尤其係今場作客沙士菲就係一道難關，跟手仲有5場波要踢，仲未坐定粒六咁話。而且小保加今日有啲麻煩，連主力鋒將白蘭迪小腿都有傷，或者要改由艾比斯拍沙治奧阿拿祖攻堅，或多或少影響咗臨門把握。




小保加射手白蘭迪未必踢




上季冠軍沙士菲已經爭標無望，仲要聯賽兩連負添，不過對住小保加呢支候任盟主，佢哋班球員都想贏波攞彩，最起碼就係要對手放低一分至走，由於有3個停賽，所以教練加西亞講明會執一執條防線，由艾曼紐奧利華拉、真奴佩雷斯任雙中堅，馬里安奴比圖路就打右閘，似乎就係針對小保加班前鋒求穩守，呢場波有機會打和。




至於另外兩場日乙，鳥棲砂岩主場迎擊FC橫濱，話到明要攞晒3分，目的除咗要追「一哥」FC東京，更重要係儲定分，等踢11月27號對德島漩渦嗰場升班大戰，事關兩隊依家只差3分，如果對橫濱都失分，月底隨時畀德島過頭，連升班資格都冇埋，所以鳥棲今日一定搶韁，就算岡本知剛、田中輝和兩件中後場坐波監都冇有怕，半場勝有1.85倍抵博。




同鳥棲鬥到頭崩額裂嘅德島，今日主場對FC愛媛，呢班波相對慢熱，半場勝唔夠1.48倍主W穩陣嘞。