里爾波圖捧場客最傷

猪拉多纳

07/11/2011
文： 蘇豪

災難周末，再次印證；歐聯過後，忌捧熱門！剛過去周末參戰歐聯名牌球隊輪住累街坊，英超「曼市雙雄」贏波輸盤，「紅魔鬼」打鑼打鼓賀老費領軍廿五周年，早盤讓兩球，未開波回到讓球半，結果踢落唔對辦，最終小勝一粒收工；盤已輸，P照開！尾場曼城初盤讓球半，開波冇耐變番讓一球，苦戰下保住熱Ｗ，算有良心。




凌晨時分，無良歐聯代表陸續現身，法甲勁旅里爾主場對伊維恩讓球半，盤口硬淨但踢落腳軟，開波初段失守後，戰至下半場扳平，之後無以為繼，最終和波收場主Ｗ熱倒。跟住仲有葡超波圖守尾門，臨場超級聚飛，作客對中游分子奧漢倫斯讓球半、兩球，成為追數「巴打」最後希望，結果互交白卷，上盤、客勝、大盤通輸！




賭球唔怕輸，最怕唔知輸乜，其實里爾對手伊維恩並非魚腩，伊維恩今季作客勁硬淨，之前六次作客聯賽僅輸一場，里爾於歐聯硬撼國米耗力多，匆匆再戰讓得離譜，絕非理想投X對象。至於波圖今季踢落明顯跌Watt，歐聯兩戰尼科西亞贏唔到，之前於聯賽作客費倫斯試過互交白卷，累人累物早有前科，以後要加以防避，提防誤墮名牌陷阱。