南陽望族賽績硬淨

猪拉多纳

　　第六場四班1650米。「南陽望族」9月中贏完，隔咗接近兩個月復出，喺10月頭曾經操操吓唔見咗幾日，原因係左前足系部受傷，好在之後操練進程再冇疏落，仲頂得住兩課拍跳，照道理冇乜大礙。

　　上場轉高廐初出即贏谷草一哩，沿路黐欄咬住好位，係慳晒兼賺晒，不過，贏得易此其一；仲有就係睇番嗰場前幾名，之後排住隊係咁贏，如「心路」、「雪山神駒」、「奄尖大少」、「萬子千紅」等，所以，締速唔快並唔係咩一回事，姿態及水準先至重要。而上季曾在百三磅樓上入P，今仗132磅應該孭到，只要腳患冇影響狀態，好大機會入三甲。

　　第七場三班1650米。「悅璐孖寶」前仗初出有好感，但上賽再跑短途，已經擔心路短，結果尾段係就係追得勁，不過上唔到名。

　　今仗轉到一哩，遠比1200米合適，而更重要係今場賽事形勢，數一數至少有3駒會採取主動，另外，仲有兩駒可能放埋一份，咁嘅環境幾難唔利追，真係開正佢嗰瓣。當然，如明晚落雨就冇得好講，假使場地狀況正常，以佢咁好後勁嘅馬，有本事一條直路掃晒。

馬會賽馬節目主持　洪禮賢