賓福特撳住尼搶

猪拉多纳

08/11/2011
文： Mic少

國際賽前夕，各主要聯賽都要讓路，周中成為盃賽嘅世界，以英格蘭聯賽錦標十六強作為主打，推介一場全英甲球隊對壘，賓福特主場對般尼茅夫。賓福特上屆喺決賽輸波飲恨，球隊上下特別想喺今屆威番鋪，已連續淘汰兩支強隊，爭標決心十足，可望再過一關，捧主勝。




（周三凌晨3時45分開賽）




英錦只准英甲及英乙球隊參加，上屆決賽兩支英甲球隊交鋒，賓福特○比一輸畀卡素爾。其實賓福特該仗表現唔錯，輸得幾唔抵，谷埋成肚氣，所以球隊今季以奪取英錦為首要目標。




事實上，賓福特今屆踢英錦，明顯比聯賽醒神，包括首圈淘汰英甲前列分子米爾頓凱恩斯，上圈更大勝榜首查爾頓三比○，而且兩場都係作客，今圈主場對中下游分子般尼茅夫，勝算更加高。




值得一提，卡素爾前屆決賽敗陣後，上屆就捧盃，證明呢種不奪錦標誓不罷休心態，對球員有好大推動力，賓福特戰意應會比其他球隊高。


般尼茅夫分身乏術


般尼茅夫近期兩連勝，但對手都係弱隊，而且佢哋聯賽排名低，隨時跌入降班漩渦，無力分心盃賽，難壞賓福特大事。