回鄉精神福到多多彪形好漢再來旺財

猪拉多纳

　　季內兩期A欄谷草賽事，普遍唔係咁利追，頭馬亦多集中於中內檔，且看是晚如場地受雨勢影響，會唔會忽然轉向？！今晚三大好手韋達、柏寶及巫斯義俱有好馬在手，前兩者的坐騎多熱門略乏味，後者坐騎則多為有賠率的冷門馬，唔係冇得博。

重心場次　第3場　第四班（60-40分）1650米

　　「回鄉精神」上季尾兩場一哩，正好作為今場指標，1場喺好黏地追得好，另1場贏埋。而上賽前曾兩度停課，復出一樣跑得出色，按理熱完身，點都再跑高啲。

　　「福到多多」剛賽已揀，指出暑後準備與以前唔同，係擔心初出未交到十足，結果直路大好形勢下，衝落冇P，的確失望，但如果一經開氣復現水準，話晒上季差不多同一時段，仲同緊「智友」埋Q，喺度好惡。

　　「彪形好漢」嚴格嚟講，兩場短途唔係跑得差，跑夠才加程，賽前又多咗拍跳，今場似係目標。「喜綵」及「閃耀小子」，班次冇壓力，但前駒賽前曾傷腳，後駒初上一哩，俱有缺點，納於邊線。

　　「再來旺財」放定唔放，對表現有着極大影響，希望今仗排中檔，驅使跑法進取番，隨時令威力增強。

第1場　第五班（40-10分） 2200米

　　「朗天」有欄與冇欄差天共地，白德民已熟晒點跑，轉谷草大長途一樣得，帳面只加兩磅，真係好賺。「喜寶寶」縱咬老本，冇理由落到五班仍要睇人面色，用得巫斯義，畀埋今次機會。

　　「壽比南山」剛仗算係跑番自己應有水準1場，不過要挑剔柏寶處理手法，喺對面直路尾走走吓唔走，希望今仗把跑法再執正啲，名次可望提升。「鐳射槍」和「步如飛」，跑法太過被動，恐地慢難反先，作配尚可。

第2場　第四班（60-40分） 1200米

　　「夢幻魔術」初跑谷草同程要博，但之前已一再克服到難度，練者轉場唔係博博吓，加上，當打準開，可信。「清脆利落」成日二二三三，博W不宜，惟對手唔多，如果唔係賽前腳有事有後遺，可出頭。

　　「風動寶」軟地及水戰有晒經驗，終於跑番谷草及抽1檔，預期會用番主動跑法，肯放，或可帶返。「皆大歡喜」四班此程往績好，而向來熱身後也有助。「卡加大師」漸漸失去信心，等落班才算。

第4場　第四班（60-40分） 1200米

　　「飛快威」確定唔係叻，四班則有牙力，就算路短依然有兩腳，事實上，剛仗唔係跑得蝕無可蝕，有梗三甲。今場換得巫斯義，唔係地慢唔掂，至少有三甲。

　　「東方駿馬」轉1200米唔知拉士仲有冇咁爆得，但上賽末段22.61秒，係當晚8場唯一23秒內拉士，唔係「嘢少」，博佢加程適應到，有權贏埋。「勁卒過河」韁口及步姿，未完全教好，初出跑質。

　　「同感」初跑此程後上入Q，但水準略有保留。「上海先鋒」經常得個追字。「一言既出」借助好位，或可跑高啲。「歡欣星」唔鍾意上場臨尾騎者策騎態度，唔係咁散漫應有Q，換人會期望。

第5場　第三班（80-60分） 1000米

　　「最佳孖寶」初出已揀，贏得比預期容易（不過賠率卻低水！），加磅唔多，冇大阻力，係怕近季冇打叠好啫（因對上1次連續上名已數到09年5月）。

　　「但求勝」及「精靈勇駿」，唔放唔得，俱排外檔難免要耗力，睇吓地慢幫到幾多，放到去邊。「勁有盈」終於排到內檔，競爭力更強。「搏得分」季內4場冇場有P，近3仗則有晒藉口原諒，係咪錯估進度，今場1000米會更了解。

第6場　第四班（60-40分） 1650米

　　「南陽望族」如地慢，好大機會跑唔出水準，太熱的話，唔建議博W。「旅遊小子」冇十磅仔，卻換上騎親至少有Q嘅梁家俊，有好冇壞。實在，對上兩仗蝕得緊要仍有三四名，證明已跑起狀態，今仗肯換人，無非為交差。

　　「浪漫添馬」再排內檔，又跑到夠晒，威力會比上賽更大。「白蹄烏」及「幸運勇士」，冇好檔，可能打回原形。「好球」與「發達心聲」，具有邊線機會，如地淋，前駒秤先。「威晒」漸見改善（馬頭冇擺得咁犀利），開始專心比賽，是仗加程又可睇多啲。

第7場　第三班（80-60分） 1650米

　　「悅璐孖寶」兩場1200米追得好，轉到一哩效益大，早已指出減分多，肯在路程配合，有圖謀。「帝豪名駒」地淋識飛，正路腳。

　　「一團威」場地略有影響。「華倫天奴」排3檔，如早段搵到遮擋，際遇好過近兩仗，或會比入P時發揮得更理想。「威仔皇」能否連續入圍？馬房問題，而計馬兩役入Q皆出色。「心中有程」、「朝東飛駒」等，今場不易以慢步速攞着數。

第8場　第二班（100-80分） 1800米

　　「按得美麗」初出沿途好位有P，好似唔叻，要知道，賽前試親大閘都扮懵，一啲都唔起眼，落場跑卻另一回事，呢類馬可塑性大。「怡勝」黏軟地及此程，令條件比上賽仲好。

　　「千杯不醉」初出短途有位置唔簡單，計正此程正宗好多。「愛睦善」及「俊鬥仕」，或可賺點形勢而跑近。「金碧亮馬」以暑後進度，上賽唔應該跑得咁差，今仗加配件及轉程，不妨跟多場。

馬會賽馬節目主持　洪禮賢