巴塞B+2夠o趙丙組仔

猪拉多纳

09/11/2011
文： 走肖

巴塞出品，必屬佳品！西班牙盃第4圈首回合聽朝有直播，賀斯比圖勒喺主場對巴塞隆拿，想偷雞冇咁易。雖然巴塞啲主力幾乎去晒踢國際賽，逼住用B＋2陣容，即係B隊班底＋2個一隊主力施度基達同艾比度孭飛，但對住丙組仔賀斯比圖勒應該夠開1.45倍「讓球客勝」。




（now632及660台周四清晨5:00直播）


施度基達 艾比度孭飛


今次巴塞有8個球員入選西班牙國家隊，美斯同馬斯真蘭奴被阿根廷徵召，阿歷斯山齊士同丹尼爾又分別要為智利同巴西比賽，加上柏度洛迪古斯同阿費利養緊傷，5個B隊成員要幫西班牙青年隊踢U21歐國外，搞到教練哥迪奧拿周圍講數，希望呢場搵番啲有級數球員壓陣。




結果，由於馬里已躋身非國盃決賽周，法國又唔需要踢歐國外附加賽，哥迪奧拿可以留低中場施度基達同後衞艾比度，帶住6個唔需要踢國際賽嘅B隊成員出戰，當中最有名氣，肯定係墨西哥國腳級中場莊拿芬杜斯山度士，即係熱刺前鋒杜斯山度士細佬，有佢幫手唔怕冇波入。


賀斯比圖勒主力巴塞出身


另外，前鋒迪魯費、中場沙治奧羅拔圖同門將魯賓美奴，分別試過被抽調上巴塞一隊，假如呢場打得好，隨時係佢哋爆紅嘅開始，點會唔搏？至於連贏7場嘅賀斯比圖勒，聯賽排第2位好似唔曳，但講到底只係丙組仔，最有質素嘅中場維拉馬遜同比圖，更加係巴塞青訓營出身，哥迪奧拿實知道點對付佢哋。