國足妄想變皇馬

猪拉多纳

10/11/2011

中國足球隊到了最危險時候，如果未能於周五晚在卡塔爾中立場擊敗伊拉克，將好可能再次無緣世界盃決賽周！大戰當前，中國主帥甘馬曹絞盡腦汁破敵，竟然妄想學皇家馬德里踢法，實在天方夜譚，莫非已壓力爆煲傻咗？


中國隊上月主場○比一輸畀伊拉克，出線前景笈笈可危，主教練甘馬曹備受壓力，呢位前西班牙國家隊領隊忽發奇想，話睇完皇馬上仗大炒奧沙辛拿後，認為「銀河艦隊」擅於邊線進攻踢法非法值得中國學習，其中Ｃ朗及比比接應傳中後上頂入，就係佢最想中國隊仿傚嘅進攻模式。

薛高風騷續約懶理國足

但如果國足都有皇馬呢班頂級球星助陣，就唔使咁頭痕啦，甘帥要國足學皇馬咁踢，恐怕未免太不切實際。另外，國足防線爆發傷兵潮，中堅人選只有趙鵬及李瑋峰冇病冇痛，若兩人有乜三長兩短，或要鄭智客串中堅。


伊拉克方面，薛高上周終於正式簽約至二○一四年，有傳年薪達250萬美元，但伊拉克足總現時只係畀咗62萬美元，據悉薛高人工同成績掛勾，如果要收足份糧，就要帶領球隊出線，所以佢已下令今仗非勝不可。其實薛高並冇將中國隊放在眼內，唔知道國足上次輸波後已取消一系列熱身賽，仲問記者國足近期踢成點。伊拉克亦任由中國傳媒採訪操練，唔怕對手刺探軍情，認真信心爆棚。