搏老命搶上位森巴二線兵照炒加蓬

猪拉多纳

10/11/2011
文： 亨格比利

今晚係加蓬國家隊嘅大日子，事關佢哋個國家體育場正式開幕，奈何將難逃被大炒嘅厄運！加蓬同巴西今晚喺利伯維爾拍跳，「森巴兵團」雖然有尼馬同卡卡兩位球星缺陣，但一眾二線兵為爭表現博上位，今鋪實唔會放過戰鬥力低幾班嘅加蓬，1.95倍「讓客」可以放心捧。（開賽時間：周五凌晨2:00）

海外兵孭飛Fans一樣多

由於巴甲聯賽殺到入大直路，巴西領隊文奴文尼斯決定唔揀國內球員，意味住尼馬、甘素同盧卡斯洛迪古斯等新星齊齊名落孫山，加上路爾斯古斯達禾冇打防疫針證明被拒入境，時隔1年半終於重返國家隊嘅卡卡又因小腿受傷，將聯同皇馬十字軍馬些路齊齊退隊，「森巴兵團」嘅星味明顯大減。


之不過呢支以海外戰將為核心嘅巴西依然猛料，計落就有波圖雙箭侯克同基巴拉奧比、拉素指揮官靴蘭尼斯同賓菲加鋒將般奴施薩辛拿基，呢班二線兵為奠定國家隊席位，肯定趁今次機會爭表現博上位。巴西大軍前日到埗展開首課操練，結果吸引咗過千名加蓬球迷到場追星，當中就以丹尼爾同堤亞高施華最受歡迎，可預期即使巴西作客都依然有大把主場球迷為佢哋打氣。

加蓬屬非洲3流球隊

今仗安排喺加蓬首都利伯維爾舉行，並且係國家體育場嘅開幕戰，呢個場由上海建工集團承辦，設計上有啲中國元素，超過4萬張波飛日前已經售罄。加蓬係2012年非國盃主辦國之一，曾經喺96年帶領波爾多殺入歐協盃（歐霸盃前身）嘅領隊諾亞，當然希望藉住今戰練兵備戰出年1月開戰嘅非國盃，不過亨格比利預期佢哋會輸得好慘，畢竟加蓬喺非洲都只算係三線貨色，陣中最有名氣已經要數到現年34歲嘅隊長丹尼卡辛，想偷巴西雞？輸少球都偷笑啦！