德軍半力夠殺

猪拉多纳

11/11/2011
文： 黑柴

今晚除咗歐國盃附加賽，仲有多場國際熱身賽，黑柴請嚟三位網上球評人同大家研究德國、意大利同比利時嘅比賽，當中德、意雙雄分別作客兩支明年歐國盃合辦國，德國足球資訊網站22Legs球評家Lakini認為，烏克蘭迎戰德國一役雖有主場之利，但主隊傷兵問題嚴重，德國收起部分主力都夠殺。


（無綫翡翠台周六凌晨3時45分直播）

薛拿首度為德國把關

烏克蘭領隊布洛堅賽前接到連串壞消息，陣中有過半數主力有傷在身，包括名牌箭頭舒夫真高同禾路連，同埋上場熱身賽對愛沙尼亞入波嘅基輔戴拿模中場阿利夫，此外，基輔陣中仲有幾名中後場球員因傷缺陣，雖然佢哋近兩場熱身賽贏咗弱旅保加利亞同愛沙尼亞，但之前遇強必敗，今年已經輸過畀捷克、烏拉圭、法國同意大利。烏克蘭當然想攞成績為合辦歐國盃造勢，但德國對佢哋嚟講實在太強，隨時避重就輕留力下周二對奧地利至搏。


德國領隊勒夫決定收起門將紐亞、隊長拿姆同箭頭馬里奧高美斯，中場舒韋恩史迪加、馬高列奧斯同前鋒高路斯分別因傷病掛免戰牌，勒夫賽前公布會畀漢諾威嘅廿二歲門將薛拿首度為國家隊披甲，佢會同不來梅門將韋爾斯各踢半場。雖然唔齊人，但德軍整體實力仍然佔盡上風，奧斯爾同馬里奧葛斯兩大當紅進攻中場仲有望同時上陣，前線亦有當起嘅舒賀爾尼配普多斯基或卡卡奧攻堅，有足夠火力攻陷烏克蘭防線。