澳洲博出線 速食阿曼

猪拉多纳

11/11/2011
文： 蘇豪

世界盃外圍賽亞洲區D組，長勝之師澳洲作客阿曼，贏波可提早出線。自從澳洲去年由奧斯錫接掌後，踢咗十九場國際賽，法定時間僅輸過一場，今年更保持不敗，可見「袋鼠兵團」喺佢帶領下更上一層樓，今仗作客包尾嘅阿曼，建議捧客W。


（周五晚10時開賽）


澳洲今年已踢咗十五場國際賽，九十分鐘未輸過，除世界盃外圍賽三戰三勝外，熱身賽作客擊敗德國堪稱代表作。奧斯錫除保留舒華沙、尼爾、基維爾及艾馬頓等老將外，亦大力提拔麥特麥基、羅比古斯、米高蘇路及尼高斯等新星，解決咗早前青黃不接嘅問題。

近三次對碰贏晒

阿曼喺亞洲僅屬二線，近年實力似乎有所削弱，踢咗三場分組賽仲未入過波，目前排D組包尾。其實澳洲對阿曼踢法可謂相當熟悉，因為佢哋轉戰亞洲區後，已同阿曼交手四次，當中近三次贏晒。由於澳洲大部分國腳都喺歐洲搵食，返回澳洲踢波路途非常遙遠，估計奧斯錫會盡快爭取出線，然後選啲二線兵踢埋餘下兩場外圍賽，所以今場戰意相當高。