領隊落柯打唔輸得 巴拉圭歎私房菜

猪拉多纳

11/11/2011
文： 郭球奇

做人最緊要有信心！為搶番出線主動權，巴拉圭領隊艾斯近日落柯打，講明一定要贏晒嚟緊兩場世界盃外圍賽，難得聽朝主場對住嘅厄瓜多爾仲一向保持100%交手勝率，主勝真係有買趁早！


（開賽時間：周六早上8:00）


應屆美洲盃亞軍巴拉圭，喺今屆世界盃外圍賽出閘脫腳，繼首場作客0:2不敵秘魯後，次仗主場1:1僅和烏拉圭，暫時排尾二。為爭出線，領隊艾斯近日向球員下命令，一定要贏晒嚟緊對厄瓜多爾同智利兩場比賽。雖然巴拉圭今次有王牌前鋒辛達告魯斯同門將維拿因傷落選，但領隊艾斯就話目前個陣容，比上年打世界盃嗰班仲勁，仲大讚祖記翼鋒艾斯迪加列比亞，同維拉利爾中場靴蘭佩雷斯兩人大大加強球隊活力添！

厄瓜多爾作客對賽全敗

對家厄瓜多爾近況超Fit，世界盃首場外圍賽主場輕取委內瑞拉2:0，之後仲喺熱身賽作客擊敗美國，錄得5連勝。不過翻查數據，原來厄瓜多爾喺歷史上作客巴拉圭竟然錄得全敗，加上今場又有上季喺利雲特踢到曉飛嘅射手卡些度落選，唔似可以破到宿命。