烏克蘭新場唔慌「德」

猪拉多纳

11/11/2011
文： 力奇

明年歐國盃決賽周主辦國之一烏克蘭，今晚喺佢哋重新啟用嘅基輔奧林匹克球場首度舉行賽事迎戰德國，想話打響頭炮咩？點知遇上嚴重傷兵問題，連隊長舒夫真高都唔知踢唔踢得，仲點頂得住擺出奧斯爾同馬里奧葛斯雙核心嘅日耳曼兵團呢？我捧1.53倍客勝。


（無綫翡翠台周六凌晨3:45直播）

烏克蘭「軍刀」有傷未必踢

為咗搞好決賽周，烏克蘭喺基輔奧林匹克球場進行改建工程，直到上月8日重新啟用。新場好唔好踢難講，但烏克蘭領隊布洛堅賽前透露，佢班波24人之中，上周操練竟先後有10人受傷，家陣只得番14個真正健康嘅球員可供調動，前線最具名氣嘅「軍刀」仲爭取趕及傷愈，但踢過利物浦嘅禾路連就肯定唔使預佢，加埋後場大鬧兵荒，對住火力強勁嘅德國凶多吉少。


雖然德國領隊勒夫都話會試陣，不過咪以為咁就可以睇小佢哋，事關勒夫就算批准隊長拿姆免役，門將紐亞又話留番下周鬥荷蘭，就連中場湯馬士梅拿都唔會踢足90分鐘，「小豬」舒韋恩史迪加同射手高路斯又因傷缺陣，但球隊後備力量其實異常充裕，個個都等住上位，難得有機會落場，肯定會更加落力。

德國雙「奧」核心孭飛

預計頂替把守大門嘅韋爾斯，固然經驗豐富，至於拿姆個閘位搵利華古遜嘅拿斯賓達，亦一樣攻守兼備。中場方面，勒夫話明會畀奧斯爾同馬里奧葛斯同時上陣，創造力勢必激增；前線都仲有馬里奧高美斯同普多斯基擔大旗，要入波自然冇難度，唔難砌低殘陣嘅烏克蘭啦！