紅運福星跑弗出擊

猪拉多纳

　　天氣時凍時熱，咁大變化，最易有病，阿棟提供賽馬心得之餘，提提讀者們，入場跑馬，帶多件衫着，以備不時之需。如果贏錢失健康，唔啱數，最好梗係袋袋平安，身體健康。今期沙田十場泥草混合賽，心水馬係第七場嘅「紅運福星」。

　　第二場四班1200米草地。「名馬」初出即勝，贏「錦衣衛」頸位，過程辛苦小小，但二馬唔係簡單，同埋，兩駒可拋甩後列一堆對手，水準點會唔好。今仗再唔係置身條件賽，不過，大部分對手都係平平無奇，季內識上名嘅其實唔多，賽事水準幾普通，如果佢自己唔係畀重磅影響，要再贏唔係難。

　　第七場三班1200米草地。「紅運福星」今季初出跑同程被捧成熱門，成績就唔成正比，輸兩乘幾跑第六名，雖然，當時喺直路曾經被撞，但唔覺係輸嘅藉口，或是進度被高估而已。而上場轉泥地，沿路在後列外叠，冇表現好正常，睇嚟都係為累積跑頭啫。終於今仗回到此程，轉用小楊負磅唔重，仲要有埋1檔，應有唔同表現。

　　第十場二班1200米草地。「紅旗勇將」今場要面對未輸過嘅「金鎸龍華」，聲勢係被比下去，但唔代表冇得撼，大家同為4歲精英，但畀人讓緊13磅，點都會拉近距離。更何況，佢唔係冇態，今季跑兩場冇W有P，目前正處當打期，本身又係演出好穩定嗰類馬，點都有保證。而隔晚有10倍W，相信賽日亦唔會熱得幾多，一於單WQ咁賭！

點買法

　　今日買W要兩件「紅」，第七場「紅運福星」射尾場「紅旗勇將」。至於TF重心場合，梗係揀尾場，一於１　１１雙膽，腳拖幾匹大冷門，如「陽明好好」、「風雲勇子」、「中國動力」，博係熱頭冷腳格局。

資深評馬人　陳華棟