榜首雙雄分途出擊 巴甲爭標夠晒激

猪拉多纳

16/11/2011
文： 亨格比利

巴甲爭霸好睇過戲，榜首嘅哥連泰斯同第6位嘅法林明高只有6分之差，證明今季嘅爭標形勢係幾咁緊湊。當中以哥連泰斯同華斯高鬥得最激，大家都係揸住61分喺手，嚟緊4輪聯賽絕對不容有失，呢對爭標雙雄聽朝分途造訪下游隊伍，為巴甲錦標作最後衝刺！

為中風教頭搏殺 華斯高圍攻彭美拉斯

漫長嘅聯賽就等同馬拉松，實力固然重要，但鬥志同決心同樣唔可以缺少。早排先中風嘅華斯高教練列卡度高美斯，最近已經行得走得，全隊上下都希望將聯賽錦標獻畀主帥，面對抱半放棄心態作賽嘅彭美拉斯自然秤先，平手盤要1.88倍嘅華斯高。


（開賽時間：周四早上7:50）


華斯高教練列卡度高美斯喺8月底中風，醫生都仲未批准佢返工，不過呢位主帥就認真有心，最近行得、走得、講得番嘢之後，即刻連探兩次班殺入更衣室為球員打氣，結果華斯高分別喺南球盃同巴甲砌低秘魯體育大學同保地花高，證明列卡度高美斯病情好轉，對隊波嘅士氣同鬥心都起到正面作用。

大菲轟彭美球員勁Hea

華斯高自2000年之後未攞過巴甲冠軍，隊長祖連奴比南布肯奴就希望助球隊一搔11年之癢，喺退役前捧盃過吓手癮之餘，再用嚟獻畀列卡度高美斯，等佢可以早日康復。即使中場羅姆路要停賽，相信都冇嘢會阻止到華斯高搶W嘅決心。


主隊彭美拉斯家陣排第14位，最近9場聯賽更加全部失分，名帥史高拉利日前向巴西報章《Lance！》炮轟球員冇爭勝意欲，計劃大執位清走陣中瘀血，並着手斟介佐治韋拿同迪亞高泰達利等球員為來季鋪路，似乎已經對今季抱半放棄態度，真係睇唔出佢哋頂得住華斯高囉！