紐價急升大起曼城

猪拉多纳

19/11/2011
文： 樂比堅尼

今晚英超兩支不敗之師交鋒，曼城主場對「喜鵲」紐卡素。曼城季初大勇，聯賽十勝一和，氣勢之強無人能阻，但陣中國腳多，國際賽後隨時有後遺症，主W得1.19倍完全唔值博。曼城今季聯賽每場最少入兩粒，入球數字咁高，建議捧1.52倍大盤。




（有線200及300台周六晚11時直播）




曼城入球數字高企，聯賽十一戰入三十九球，係英超入波最多球隊，除主場贏愛華頓二比○一仗外，其餘十場全部開大盤，雖然曼城今仗有主將拿斯尼因傷缺陣，但曼城最大優點係前線好手多，邊個唔掂就換到掂，球員輪流發威，冇晒以往海鮮味，所以理論上長追大盤冇乜錯。


曼城大盤率高


其實樂比仔刨波一向唔多睇數據，但事實上曼城數據確實好強，連盃賽佢哋近八仗全勝之餘，更足足入咗三十球，即係平均每場入3.75球，淨係一隊都夠開大，如果以今場大盤1.52倍計算，其實已相當值博。




紐卡素今季表現超出預期，目前排第三，全靠球員將士用命，領隊柏杜今季成功將「紐」價推高，早早搵到贏波方程式，新加盟嘅丹巴巴亞好使好用，狀態甚弗，至今已入八球，係紐卡素前線重要棋子。曼城防線唔算全無破綻，「喜鵲」絕對有機會喺曼城身上取得入球，令今場波開出大盤機會大增。