多蒙特再大拜仁

猪拉多纳

19/11/2011
文： 蘇斯黑柴

德甲壓軸戲國家打吡拜仁慕尼黑主場鬥多蒙特，呢場榜首大戰如果早一、兩個月舉行，拜仁贏面高唱入雲，不過目前雙方狀態此消彼長，加上拜仁中場兵源短缺優勢銳減，今場要讓多蒙特半一，黑柴捧入球大同下盤。




（有線61及201台周日凌晨1時30分直播）




拜仁今季實力大幅提升，喺八、九月間仲曾經踢出各項賽事十連勝兼一球不失嘅強橫氣勢，不過無論你點強，都總會有起落時，拜仁自從聯賽不敵漢諾威後走下坡，近期雖然喺各項賽事四連勝，但歐聯主場對拿玻里領先三粒都要輸番兩球，上仗聯賽對降班膽奧格斯堡亦領先兩球被破蛋，搞到防中泰摩斯卓克末段情急飛剷對手被逐，霸氣大減，狀態處於調整期。


拜仁兩大中場缺陣


拜仁火力強橫，前線馬里奧高美斯、湯馬士梅拿、列貝利同卻奧斯都弗，魔翼洛賓亦傷愈任後備，入球能力唔成問題，但今仗兩名中場大將舒韋恩史迪加同泰摩斯卓克一傷一停，中場防守力大為削弱，教練軒歷基斯要出動小將阿拉巴任防中，面對大把優質進攻中場嘅多蒙特隨時成為缺口。




多蒙特季初開得曳，但近期已上番晒力，近六場聯賽五勝一和追番上聯賽榜次席，只落後拜仁五分，其中大炒奧格斯堡、科隆、禾夫斯堡同作客擊敗主場全勝嘅不來梅，都見到逐漸回復上季狀態同信心，多蒙特上季就係憑強勁氣勢喺聯賽雙殺拜仁，其中作客仲喺門將維丹費拿同中場大將香川真司雙雙缺陣下贏三比一，今仗即使有中堅蘇保迪因傷缺陣，面對調整期嘅拜仁一樣有得砌。預期今仗雙方開賽即對攻，雙選入球大同多蒙特下盤。