洪禮賢講馬：蓬萊仙子賺形勢

猪拉多纳

        第六場三班1200米。「開心動力」上周日跑完，約莫個幾禮拜後再跑，會唔會由尾二變第一？唔係冇可能，因班次、路程、騎師等，統統唔同晒，而季內方廐有近似例子如「駕世仔」，跑完包尾後翌仗入Q（班次、騎師、路程及場地有變），所以，前駒的確有變數。
        
        此駒上場跑到一戙都冇，根本唔覺有參考性，一切皆因「外遊」及盲門路程所致。如果唔計上賽，之前兩場跑得好好地（二三班田草1200米），初出後上輸近（賽後騎師被嚴厲譴責直路騎法）。翌仗喺末段拍住剛勝出「齊歡唱」一齊返嚟，大概已知此駒唔係退化到三班唔夠爭。今仗落班跑番谷草，並用回柏寶，仲抽埋C欄2檔，要變身可謂大條道理。
        
        第七場二班1650米。「蓬萊仙子」連搏兩場後，順勢唞一唞，體力或叉番足夠，而睇佢之前一放到底贏泥閘過程，休戰未有生疏手腳。雖然，早已說過此馬在二班唔係高人一等，可一而再入Q，夾埋輸唔夠半個身位，在百分關口前，應仍有1W未兌現。睇埋今仗形勢，同場係得廐侶「順利得勝」有機會喺早段快過佢，假如「蓬萊仙子」唔刻意搶，沿路甘心守住貼欄二三位，待至直路先透出，韌度或比之前兩仗更強。