邦先生打叠贏

猪拉多纳

　　今季跑過九次谷草賽事，何良馬房次次有馬上名，鑑於數據太硬淨，與其跟他作對，倒不如順應潮流，今次賭博士揀了兩匹何廐馬一試運氣。「奄尖大少」跑來跑去都是谷草1650米，同程無疑是唯一出路；上仗牠排十檔起步，埋門票數軟弱不堪，未跑已散發出陣陣燶味，最終雖以第七名衝線，並僅負頭馬一乘許，表現比想像中出色。

　　有口痕友指出，「奄尖大少」前仗已贏馬交代，幕後收夠籌故接戰飽食遠颺；但依賭博士見解，上季此駒評61分挑戰三班馬也能入Q，身處四班根本是超級貨色，上仗落敗純粹是黏地累事，並不宜用陰謀論來揣測幕後動機。賭博士的分析是耶非耶？到了今晚自有分曉。

　　「邦先生」上仗憑一條直路將對手一網成擒，取勝姿態易如拾芥。北半球處女馬一旦開竅隨時可贏到你唔信，今次賽前已小休個半月，也予人操好才出之感，既然上仗排十二檔都有本事贏，今仗再跑一哩兼獲四檔之助，可食尾胡。

賭博士