洪禮賢講馬：夢幻十一佳同閃耀之星太極至尊

猪拉多纳

　　今晚谷草C+3欄C+6彎賽事，內檔馬向來着數，如果唔係，對上3期同一賽道嗰24場W，都唔會有14場係1至4檔馬勝出。

　　
　　講到騎練方面，沈集成及告達理馬房兵力唔錯；騎師則以韋達、潘頓及吳嘉晉較多機會馬。

重心場次　第6場　第三班（80-60分）1200米

　　「夢幻十一」四升三班幾乎贏埋，段段快之下輸短頭畀「洪福齊來」，證明加分後仍未追到目前進度增幅。既然初出亂跑仍可在谷草輸得唔遠，場地性能點會唔好，如果唔係搏攰咗，今場好大機會補中。

　　「佳同」最近谷草由頭放到尾，除眼罩試來全程貫注，反映近況仍好，只要今場出閘冇事，又唔會好似上場咁留到隻馬忟晒，有權追入前列。「馬風雲」唔增程而繼續負重，限爭P。

　　「閃耀之星」目前進展唔大，但1檔預咗會賺，位置居多。「星運俊爵」10檔已不易克服，加埋內側多快馬，隨時頂在三叠，未必蝕得起。「太極至尊」唔跑同晚1000米，可能係上場田草1200米追得好嘅關係。

第1場　第四班（60-40分） 1000米

　　「幸運多寶」降班出戰唔同晒，上場負重兼前中段跟快咗，拉士仍然幾貫注，睇到佢喺四班嘅優勢。「喜萬家」食緊老本，成日會近而難贏。

　　「樂有贏」12檔好大影響，又係要遇到早段扯得散至有機會。「勝在分秒」明明賽前試閘見好，兩場跑落卻另一回事，難明原因，今場對手再弱啲，睇吓成績會唔會止跌回升。「威晒」路短仍上名，好大程度係當晚利追，轉了賽道或會兩回事。

第2場　第五班（40-10分） 1800米

　　「康樂名駒」五班長途一線馬，既在狀態，又有足夠日子回氣，喼到成績嘅成數都幾高。「威陽」排喺內檔，對發揮直接有幫助。

　　「步如飛」如果唔係曾受困，上場應該贏咗，如短時間縮程冇問題，唔係冇資格贏。「龍騰寶駒」未開氣兼半程蝕腳程，可在此程入P算叻，值得追。「無敵福星」今仗好位，唔應該似上賽焗放，究竟轉倉後有冇進步，睇埋今場。

第3場　第四班（60-40分）1200米

　　「軍士」剛仗贏得險，多多少少有睇住食之感，計帳面數，負磅仲比上賽輕，有權打叠W。「名馬」1檔及跑法進取，略有形勢之助，但過熱不值博W。

　　「皇仁勁駒」跑形勢之馬，4檔有利發揮，當然，計評分其實唔易贏。「金財子」剛賽前已指出，可能除罩能令佢放得冇咁促，而出來效果幾好，今仗2檔仍可追。「同感」、「好玩神駒」納於可博而冇把握之馬。

第4場　第四班（60-40分） 2200米

　　「得運歡笑」太細隻，跑泥地唔易應付，上場大敗唔使驚。落班即轉回草地，又用番贏馬配搭，只要唔係長力唔夠，以佢上季能贏當弗「中華寶寶」，喺班內長途應該係一等一好手。

　　「不老英雄」又遇「橫亨」，讓磅差距再大啲，後駒略有利。「好球」和「太陽奇妙」，前駒跑法可取，後駒近績算穩定，邊線馬。「智財」側頭毛病由前仗開始已改善，唔排除加程見到成效，冷門勿忘。

第5場　第三班（80-60分） 1000米

　　「紅衣叻叻」上場1200米喺早段快得過「魔幻大師」，有番應該有嘅速度感（頭兩段比標準時間快），而放至最後百米先至冇力，反映進度漸漸返嚟，今仗回到主項，或可帶返。

　　「祥禎」贏馬時間為季內同程最快，希望上班負輕磅減低阻力。「勁有盈」新勝同程，但此廐呢類馬再出往往喼唔到。「精靈勇駿」三班成就止於季軍，好在今場內側幾駒唔快，有機會放得出，睇吓捱到去邊。「尊皇騰龍」終於肯返此程，如7檔唔係被頂在三叠，有P望。「競駿寶寶」近兩仗大敗有藉口，呢場好位又可能多馬走，形勢啱夾，冷腳可拖。

第7場　第三班（80-60分） 1650米

　　「勁飛揚」上場已鍾意，贏得比預期輕鬆，應該係轉了配件、路程及跑法嘅成果，既然之前有誠意試埋谷閘，立心爭連捷。「悅璐孖寶」肯重戴眼罩（前季5次上名俱有此配件），證明唔想浪費目前進度，想搏到贏為止。

　　「華倫天奴」啱啱入Q一役，已經跑到一絕，唔易再有進步，好彩今場冇馬放，隨時畀佢控制晒形勢，放到入三甲。「大雄風」上場輸近唔係證明好多，要再引證，但可能1檔賺到。「正黃旗」贏完隔得耐咗至復課，有少少戒心。

第8場　第一班（105-80分） 1000米

　　「大把在手」太準了，跨越3季17場唔甩前四名，唔揀係違反數據。「高風格」鎖定今場為目標，以之前贏同程姿態，負磅加咗，尚有爭逐本錢。

　　「此時此刻」操練流程有少少瑕疵，希望唔會影響到進度。「風雲勇子」此程能贏「勁勇士」，而季初此程塞車都得殿軍，倘跑出水準，或可反先「高風格」。「風之子」破格1200米上名，之後有工夫承接，回到強項，更具威力。