苗禮德大力支持 莫雅再施勁擊

猪拉多纳

　　今晚係一年一度盛事國際騎師錦標賽，原來已舉辦了13屆，而不可不知，暫時未有1位騎師可連續三度封王，如果係咁，呢屆莫雅咪一定冇機會（已連贏兩屆）！不過，以馬論馬，莫雅今晚嘅坐騎，如果一啲都交唔出成績，肯定令好多馬友失望。

　　順帶一提，除咗莫雅，紀仁安今晚都成手馬，呢兩位猛將梗要盯緊。講番莫雅，唔理係咪抽嘅都好，苗廐共有4駒支持，分別為「東方駿馬」、「勁擊」、「精英財星」及「睡得好」，以呢批馬能力，要有W到手唔難。

　　「東方駿馬」喺谷草短直路好似跑到識飛一樣，總之，1000及1200米俱屬射程，如果133磅非致命傷，可再捷。

　　「勁擊」上屆就係抽到配莫雅，結果喺騎師賽其中一關勝出，世事有時就係有咁啱得咁「翹」，一年又人馬再重遇，而呢匹馬上仗的確追得好，歷史重演唔係冇可能。

　　至於「精英財星」及「睡得好」，兩駒今季未有咩實質賽績支持，論評分又唔係有咩優勢，不過諗深一層，如果今晚老苗係大手出擊，冇理由整兩件完全唔掂嘅馬一齊嚟，咪過分睇淡。

Jack