好香港風動寶精英勇士好利佳

猪拉多纳

　　近兩期谷草B欄賽事，側重晒一堆後上馬，完全違反多年來模式，唔知因咩解究？不過，持續落去又唔係壞事，起碼投X者有得跟。

　　
　　而今晚韋達及何澤堯，有唔少有餐士嘅馬在手，當然，後者啲坐騎多為賠率唔太熱，較為值博。

重心場次　第4場　第四班（60-40分）1200米

　　「好香港」初出直路狂追，造出嘅末段時間係當晚8場最快，簡直「恐怖」。如果唔係冇咗新鮮感令此程嫌短，又或是1場散了，應贏。

　　「風動寶」上場已做啱晒留放，仍輸畀前駒，正常情況下，不易反先，計本身實力則唔難入圍。「精英勇士」差唔多跑盡咗，好在今仗負磅減、檔位好，希望擺脫三三四四命運。

　　「好利佳」前置跑法在今場或會賺，而轉到短直路可能仲好放。「日月暉華」後追跑法往往來遲一步，TF腳則唔反對。最睇唔通係「孫子赤兔」，腳法幾吸引，初出未必只為熱身。

第1場　第五班（40-0分） 2200米

　　1場冇重心、熱門又唔多穩陣嘅場合；「實業傳奇」此程曾入Q，雖然嗰場係冇咩威脅，算係今場少數有大長途支持之馬。

　　「彩虹幻影」比較之前兩大閘，12月嗰次試得幾好，至少末段騎過有反應，本身喺外地跑到2000米，今仗落班大幅加程，用埋眼罩，畀多次機會。

　　「鐳射槍」及「步如飛」，此程可勝任，實力卻唔突出。「善風」班次佔利，未夠態唔代表冇威脅。「恭喜發財」與「速度快」，內檔和跟前跑法，有可能賺形勢。

第2場　第五班（40-10分） 1200米

　　「雄姿儷影」負重和外檔，或令上場直路衝唔起。匆出肯換小將，路程冇變，跟多場。「咁都得」速度唔係大部分對手可比，12檔唔怕，係擔心重磅啫。

　　「好玩神駒」如果有番之前兩場嘅拉士，睇唔出有咩馬可以抗衡到。「厲行星」若臨場情緒冇事，陣上好少跑得唔好。「盈驥」還是1000米比此程有把握。

　　「嘻哈大少」6檔預早段喺二叠，或會蝕得起，邊線馬。

第3場　第四班（60-40分） 1800米

　　「好運得福」健康有事出番嚟，喺嫌短一哩亦追得勁，按理熱身後令進度重上軌道，而今場1800米仲啱，爭勝機會高。

　　「有盈有利」減分過多，喺四班長途係筍盤。「十足十」多年來匆出成績普通。

　　「金瑞」係怕搏到第3仗唔夠體力，實在此程比一哩更合適。「橫亨」又係體力問題而已。

第5場　第四班（60-40分） 1650米

　　又係今晚另1場冇重心隨時爆冷嘅場合；「清風駒」近兩仗排內、外檔，成績完全唔同，希望今場5檔，可以有番前仗贏馬時水平。

　　「錢程萬里」及「精算拍檔」，一對前領馬，撞啱今場未必有步速場合，兩駒如拖慢，隨時一Q返。「回鄉精神」唔打鞭，成日追唔切！「飛躍之旅」重磅削弱實力。

第6場　第三班（85-60分） 1000米

　　「按一按」今季贏過三班同程，之後連跑3場二班得個近字，證明唔係狀態有問題，呢次跑低半班，又轉回最佳路程，有番晒競爭力。

　　「多益善」兩仗前同程入Q水準，根本喺今場夠贏有凸！可惜鬥志難測。「但求勝」排11檔，要再有上賽夢幻形勢唔容易。「競駿寶寶」剛仗有拖，而今仗形勢差唔多，依然會近。「祥禎」如果跑得蝕唔過上賽，必可反先前駒。

　　「享耆成」係買1檔及回跑1000米，如果以佢之前賽績，評分好大壓力。「先鞭直前」係擔心健康問題。

第7場　第三班（80-60分） 1650米

　　「靚到爆」漸漸跑起狀態，而今賽唔使負重磅，場地又正常番，如果唔係早段過慢，直路就係佢世界

　　「南陽望族」及「勁飛揚」，一對馬韋達啱啱贏完，姿態大家都咁輕鬆，締速則以前駒優勝。

　　「一團威」長期負重磅，就算好位亦只有P望。「魅力星」及「威仔皇」，前駒夠準、後駒經常喺末段爆上嚟，可兼顧。

第8場　第三班（80-60） 1200米

　　「友瑩果」太準，仲有埋3檔之利，冇咩意外，幾難冇P。「閃耀之星」長期會近而難贏，正路腳。

　　「喜來仙子」跑到第2仗即現形，但上賽入到直路騎得幾猶豫，嚴格嚟講，唔係衝得好勁，宜睇多場作證。「光輝出擊」略有級數，加罩得唔得則難定。「自由勝」肯返谷草或代表跑夠，實在上場直路賽跑得比預期出色。「最著數」、和「幸運多寶」，實力備受考驗。

馬會賽馬節目主持　洪禮賢