天外之天能力翻一番

猪拉多纳

　　第十場二班1400米。「精彩日子」初出贏此程締速唔係快，只比同日四班快0.04秒，但過程就好誇張，因早段用咗唔少力由外檔切入，途中仲要二三叠望空跟前，最終贏到對手甩晒，少啲本事必敗無疑。

　　上賽再贏同程時，因前中段楔到好位，冇前仗嘥咁多力，所以，到出彎後韋達曾經輕敵，一度冇伏低身用力騎，係去到最後百幾米，「紅旗勇將」好似有啲迫近，佢先至「烏」番低啲出力騎幾步，而在玩敵情況下造出1.21.4，締速係季內第四快（最快嗰3匹馬均在一班或以上賽事）。如果呢兩場唔係消耗晒體力，或補充唔切，上二班仍然係超級分子。

　　第十一場三班1400米。「天外之天」就算初出有新鮮感，1200米都係嫌短，事實上，隻馬去到最後百米左右至啱啱撻着後勁，唔係衝到幾多步就過終點，仲有P算佢叻，睇嚟實力比去季3歲時進步。

　　熱身後轉戰此程，梗係好好多，話晒三班此程曾勝「好得意」，點會冇把炮！如果加埋暑後能力續進嘅概念，三班負重亦讓得起對手，寄望11檔唔會令早段喺最外叠蝕，攞位順順利利的話，贏面幾大。

馬會賽馬節目主持　洪禮賢