遇啱時機博大霧

猪拉多纳

　　有時寫賽前大勢，有啲寫完都說服唔到自己，當然唔係指亂噏，是是但但搵幾匹「老作」一場大勢分析。而係部分場次，經過思量、落筆後，寫完出嚟都好似唔多啱心水，但又搵唔到其他分析角度，或者完全唔同嘅睇法，通常呢類場合都係爆冷居多，或是賽前揀半數馬，都中唔到P之類局面。不過，遇到呢類場合，博懵正合時宜。

　　爪皇豪火轉跑法難料

　　就如日前第九場賽事，洪某臨場中到「爪皇豪火」獨贏，其實本來冇心去買，但賽前總認為幾匹熱門唔對路，如「新力多」和「中環英雄」，寫大勢時已指出兩駒未必有本事連捷，因前駒大部分條件轉晒，後駒冇內檔兼重磅，唔知變成點？！。所以，兩駒也沒有納入大貼士之內。而「爪皇豪火」上賽沿路「外遊」，仍然喺末段有兩腳，的確唔簡單，不過，今場我也估唔到佢用另一套跑法勝出，賽前只知道此駒遇番同一批馬，如跑得冇咁蝕，已有入圍機會而已。

　　當然，若果遇上星球馬「精彩日子」場合，再加埋「新希望」和「紅旗勇將」同場，刻意博冷，成功機會大大減低，因為要過完一關又一關，同時，如果有隻咁有能力嘅馬，又點會唔係熱門噃！

馬會賽馬節目主持　洪禮賢