對熱門馬要諸多挑剔

猪拉多纳

　　熱門馬值不值博？彼此睇法大不同，純粹公式運算作取捨，除非當中滲入嘅要求細節一樣，如果唔係，總會有啲偏差。所以，熱門馬好唔好「瞓身」？事前真係要心水清，以及多加挑剔。

　　正如同文嘉豪多年前已講過千百次，對於冷門馬，只要有一兩項睇好嘅因素，已經值得去博，原因係回報以小博大。

　　但係買熱門馬嘅情況剛剛相反，如果得兩倍獨贏，隨時係一命博一命格局，唔抱住眼角高、要求嚴格、諸多挑剔等等嘅態度，損失嘅咪又係自己。

　　譬如周中夜賽「名馬」，賽前已覺得佢排咗C欄9檔，會唔會有上賽際遇，不盡然吧，仲要上賽C+3欄1檔係廿幾蚊馬，呢場又係捧到兩倍半W（最終回到3倍以上），的確唔啱數。

　　博駟馬難追輸亦過足癮

　　正因為，呢場熱門馬有危機，此類場合就係搵冷門嘅好時機，雖然，最終個人投X嘅「駟馬難追」都係輸W，鬥到壓線一步被擒，真係冇說話好講。以阿Q精神安撫自己，起碼叫胡叫足千一米有多，比起沿路三叠嘅「名馬」，出彎便開始墮退，輸得轟烈得多多聲。

馬會賽馬節目主持　洪禮賢