第三場三分天下

猪拉多纳

        今日係聖誕節，普天同慶日子，喺度謹祝大家聖誕節愉快，有多啲禮物拆。作為馬迷嘅你與我，最好嘅禮物莫過於贏馬，開心錢是也。
        
        除咗昨文提過呢期賽事之中，有個東廐生日概念之外，其實，3場泥地賽亦可能要多加重視。感覺上，好似冇得點爆，至於賽果係咪與預測相符，梗係要跑過至至知，但起碼賽前係認為部分熱門幾穩陣。
        
        勁信心內檔佔利
        
        就以第三場為例，3匹核心馬「勁信心」、「好利佳」及「清脆利落」，應該靠得住。之前喺總場次197，佢哋已經對戰過，成績以「勁信心」最好，跑獲一席季軍，呢次再遇，依然會係機會最高1匹。雖然上場跑到一戙都冇，匆出體力不足或者係主因（過去6次喺10日內跑兩場，僅1次入圍），其次，陣中發揮極差劣（唔排除係檔位影響），沿路最外叠唔上唔落。呢次唞番3周，又肯換人，繼續有內檔之利，可能交得番前仗水準。
        
        至於「好利佳」及「清脆利落」，前駒前仗初跑此程放至埋門冇力，與早段放得略快有關，假如今場拿捏得更準，因應場地或利前／中置跑法，威力或可提升。後駒上場騎師唔係顧住修正內閃，未必冇P，呢場換騎師，而仍排內檔，機會唔應該差得過上場。