喜來仙子持續進步

猪拉多纳

　　谷草A欄賽事點都好刨啲，賽道冇咁大偏差，唔會一味內檔馬玩晒，好似之前兩期大外檔馬紛紛勝出，如「東方駿馬」、「千杯不醉」等，所以，鍾意外檔馬都唔會唔敢買。至於今晚形勢，望落幾場短途賽比較有「譜」，希望唔會爆得出樣。

　　第二場第四班1200米。「雄姿儷影」轉到方仔手上明顯叻咗好多，但唔係馬後炮，如果馬友有睇臨場動態，唔難睇到隻馬冇以前咁瘦，表面上體重好似唔係重咗好多，身形比前壯碩就好易分辨到。睇佢上賽打開勝門表現，過馬姿態輕鬆，二馬「生生發」完全唔係佢手腳，而後駒之段成功補中，照咁計，上番四班一樣有得揮。

　　第五場第三班1200米。「喜來仙子」在港跑過3場，成績仗比仗進步，前仗1000米已後追有勢，上賽回跑此程，如不是末段走勢未熟，應該有更接近演出。雖然，再跑落去，佢會以中距離為射程，不過，由於早早有表現，證明係有分在手，只要跑完上場後，本身稍為有多少進展，喺1場唔算強嘅谷草賽事，要問鼎冠軍唔係難。

　　第六場第三班1000米。「幸運多寶」連場跑得好，先在谷草1000米輕取對手贏馬，上賽四升三班，並轉戰1200米，演出仍出色，僅以些微距離不敵「光輝出擊」屈居第二，擺明在三班依然有惡氣。今仗趁勇再戰，對手不見得比上場強，交出水準有力補中。

資深評馬人　陳華棟