大家勝利閃耀之星馬上得勝精英財星 華美之星自由萬歲至尊飛星進勝福星

猪拉多纳

       　騎師陣容唔完整，部分騎師因而受惠，就連成績下游嘅，坐騎數目亦忽然多晒。至於邊位騎師手上較多惡馬？白德民及巫斯義是也。
        
        　今賽在田草B+2欄舉行，睇番今季紀錄，跑法檔位偏差唔大而較多熱門跑得好，但願今日亦如此。

        「大家勝利」轉泥地唔掂，場地性能問題而已，與近況無關。轉頭即重返最有根據路程，證明唔想浪費此際狀態。而上賽前都講過，之前敗仗有晒藉口，喺三班未必已感壓力，建議睇埋今場。
        
        「精英財星」上場有揀，跑落表現收貨，如非外檔影響，贏面不比前駒低。「閃耀之星」在此類三班中下級水平賽事，才會有爭標之力。
        
        「太陽海岸」加罩縮程係理性安排，但效果如何要跑過至知。「馬上得勝」大閘表現1次好1次普通，未摸清係跑法定係配件所致，但只要本身速度感唔係落場就冇晒，又肯帶放的話，已有權接近。
        
        「合駿騰飛」剛在谷草輸近，陣中走規係好咗，惟略嫌上場去到末段好似唔多爆得起。


        「甜蜜至上」發完燒，停咗幾日課，對進度有幾大影響？好難預測，純計班內中短途能力，則肯定一等一。「咁都得」、「風度翩翩」及「放縱」，跑法一式一樣，早段搶位、際遇及耗力程度，將會係爭勝關鍵所在。
        
        「海豚」今仗內檔形勢，梗係與上賽有極大分別。「齊齊掂」操住等今場，10歲馬儲夠體力嚟搏，有埋3檔或會沿路慳到，唔排除有P。

        「龜兔競跑」初出由頭快到尾可保Q，唔係容易辦到，加上，頭馬係「名舵主」，更覺佢輸得光采。
        
        「好好友」首仗靠大步檻入圍，因已熱身，縮程未必幫唔到。「開心指數」賽前兩大閘，展示出快閘及良好速度（稍嫌末段未夠韌），初出選擇直路賽啱數。「尚駿心」班利馬負磅減少、「威晒」連場追得好，俱可兼顧。

        「精彩遊戲」睇腳法加程會好，3檔預算唔會留得太後，如改用中置跑法，或比後追更有競爭力。
        
        「財寶鷹」衰在出閘例慢，但上賽轉此程明顯更有追勢。「財神駕到」冇特殊竄勁，轉到此程比1400米稍易應付。「駕世仔」大閘死騎冇反應，但季內此廐唔少此類例子卻跑得好，過冷要小心。「喜綵」評分有着數，賽前操練亦有唔同，肯返田草唔再玩泥沙，憑1檔如早段咬到靚位，有權爆。

        「過關勇將」及「大衛金剛」，跑法近似，都係靠霸好位而直路鬥檻，喺今場對手唔叻，又冇乜步速場合，已具出頭機會。
        
        「馬皇帝」、「偉感」和「陽光王子」，剛賽同場俱接近，論取位及跑法最蝕係前駒，但成績最好，如果唔係忽然走樣，今場有補中資格。「森淼盛」季內兩場大敗，1次係心律不正、1次直路三番四次被撞，完全與實力和狀態無關，計分已在支持線。

        「好食德」加罩跑短，只要唔係冇效果，略賺級數，始終季初入Q嗰場，係四班好好指標賽事。「田園名駒」及「一定快」，彼此各有缺點，前駒韌力不強，後駒唔易保持，縱有卡士亦只宜作配。
        
        「皇仁勁駒」唔係外檔，其實係主角之一，依家要睇早段泊到咩位。「永旺家」休出有做嘢，但唔係冇「甩咳」過，視乎進度有冇受到影響。

        「好香港」及「紀利威威」，唔會冇前景，前駒轉場及加程，佢嗰段爆炸力可能有更好發揮；後駒初出冇狀態可言，跑落幾乎有Q，虛分好多。
        
        「尊勝福星」12檔難免早段走多咗，目前未係好收斂，恐拉士埋唔到尾。「大旋風」用小將繼續搏，未有意思返谷草，若賽事形勢猶如上賽，唔係冇可能帶到。「奪金」跑兩場仍未成熟，只係對手唔多，同埋已有此程經驗，稍有憧憬。

        「藍城堡馬」已連揀兩場，四升三班嗰場跑得好，證明進度快又夠班。「多益善」有冇高估轉馬房後威力，唔使三場有答案。
        
        「勁闖駒」準繩卻檔差，爭位居多。「首飾達寶」與「紅運福星」，級數或與前三駒有距離，納於邊線。「精靈勇駿」搏完1場，保唔保持到？根本難以正常預算。

        「華美之星」上場放頭冇尺寸，頭兩段造出比group分段時間仲要快，加上，拉士要大力勒避，先至輸得較遠。經過1場實戰，又肯轉配搭，如跑法正確可取勝。
        
        「自由萬歲」未斷纜前，上升阻力位不宜假設，不妨尊重賽績。「超群名駒」草轉泥即入位，但今場又轉番草地中程，評級唔會提高。「至尊飛星」有好位幫手，隨時交回前仗水準。「進勝福星」1檔預咗有賺，跑法又主動，正路腳。

        「禮尚往來」之前初跑此程可與「甜將」鬥過，最終只輸1個身位，嚟到二班場合負磅仍輕，點會冇得鬥。「新希望」二班頂馬，係因重磅及外檔略打折扣。
        
        「超皇鷹」回到此程，未必有番1200米嗰段後勁。「伽羅」賽前腳傷有幾大影響？睇復課就應該唔係好大問題，而近仗因意外多多影響表現，如發揮正常，二班中程隨時入到前列。再揀落去已數到重磅「好友福」及「多采多姿」。