短途盃劇味十足

猪拉多纳

　　韋達停賽嗰3期賽事，出現輪流威嘅局面，近兩期更有潘頓及巫斯義連中三元。嚟到今期前者復出，出馬唔係多，未必會出現強勢回歸情況，呢點要小心思考，咪過分樂觀看待復出之日。

　　今期焦點賽事當然係百周年紀念短途盃，其實幾有「劇味」，唔似得之前幾屆有一兩匹馬高晒，令到場面單調。何況，周日如有雨，更會有好大影響，事關有部分選手遇慢地會企晒喺度。

　　貴為應屆短途王「天久」，卡士夠晒（近5屆例有短途錦標三甲馬，在此盃跑入前兩名），但未跑過直路賽，慢地性能又未詳，已經有兩大問號？未必如想像般機會壓一。

　　「蓮華生輝」係老咗退緊落嚟，不過，縮落1000米點都比1200米合適，又睇吓可唔可以衝擊18場頭馬。再數落去，「小橋流水」會唔會經上場後，有番輕勝「XX繽紛」嘅表現，同樣係未知之數。

　　大摩又玩心理戰

　　而盃王大摩出3件，「新力勁」、「共創未來」及「飛闖」，主力誰屬？又同大家玩心理戰。仲有直路賽準到痺嘅「鷹之團」，蝕21磅掂唔掂？未跑過group，唔可以話一定唔得，或者佢喺此程能力唔只值106分，帳面蝕啫，唔代表機會渺茫。

馬會賽馬節目主持　洪禮賢