劍臣變招爆得

猪拉多纳

　　今期沙田馬場草泥地賽事，草地賽採用C欄。韋達復出，又會惹來一班熱情粉絲捧場，雖然，我亦覺得佢有啲馬係贏得，唔應該會空手而回，但馬場之內，尤其在賭博角度而言，真金白銀嘛！好多時要收起熱情，冷靜面對所有事情，故此，咪因為復出兩字，便亂咁追住買。 第一場四班1200米。「劍臣」初出由柏寶騎，一樣冷至廿倍有多，而比賽時冇嘢睇，走位10-11-10，冇邊段走勢吸引。不過，有兩點可以攞出嚟分享吓。其一，佢唔係因為走規嫩水引致表現差，走勢算係成熟；其二，最後幾十米柏寶明知大勢已去仍不斷抽鞭試吓有冇反應，係有心思。而呢個父系嘅馬，好多不出頭兩場即可交出成績，自購或PPG亦如是，所以，熱身之後，忽然轉場、加程、換小將，爆出有咩奇！

　　第五場四班1400米。「神奇飛龍」轉高廐跑到第2場即勝，一返到草地賽，隻馬完全唔同，證明前仗純粹場地問題至會輸。睇佢上賽贏馬表現，入到直路衝得好勁，目前進度已超出四班範疇，加9分再戰點會有影響。

　　第九場三班1200米。「夢幻十一」單挑「飛燕」，夠唔夠鬥？都未對過，唔係冇可能性存在。而前駒獨贏十倍八倍，後駒得十幾蚊，站於菠菜角度，賠率高水值得一試。而講到實力，佢亦已征服三班，進度再向上升，如果「飛燕」因之前停課稍為影響進度，「夢幻十一」就有機可乘。

陳華棟　資深馬評人