威水福星 擺明搏命

猪拉多纳

　　柏寶、楊明綸及蔡明紹復出比賽，騎師陣容完整過之前，而前者今期幾多馬跑，寄望佢老哥醒醒定定，咪成日令粉絲輸到眼定！講到今晚快活谷C欄賽事，睇落「下半場」啲熱門多數有根據，未必會爆得去邊。其實全晚賽事，泰半係有賭頭。

　　第一場五班1650米。「威水福星」轉廐即勝，初出喺一哩一啖氣放返，二三名完全威脅唔到，伍碧權新接手即省靚招牌！之後兩場唔得，都唔關狀態嘅事，因為有1場輸在外叠耗力搶頭，另有1場就輸在出唔到閘。今次賽前特別儲足新鮮感，過程中工夫又做到加零一，仲要換個柏寶上去，唔係搏命，唔通為熱身咩！

　　首飾達寶夠快

　　第五場三班1000米。「首飾達寶」今季入P後連輸3場，其實有冇藉口再原諒，好坦白講，如果再跑田草，阿棟眼尾都唔會睇吓佢，因為，再之前兩場跑晒亦P。但係轉到谷草，對手冇咁強，點都會減輕喺三班壓力。本身速度夠快，5檔起步要跟前並唔困難，若果唔係逢彎就亂晒步韻，應有三甲。

　　第七場三班1200米。「勁卒過河」近仗的確勁，直落連贏3場，由此程贏到過去沙田，上場強如以後勁見稱嘅「快樂無窮」，末段一樣過唔到佢，表現出更進步走勢。轉頭又返此程，主要對手得1匹「友瑩果」，唔係跑錯晒，佢跑法會比主要敵人有利。