馬房步入攻擊期 李易達又嚟發威

猪拉多纳

　　踏入新嘅一年，新曆又好、農曆都好，有部分練馬師真係轉運，蔡約翰繼續維持強勢，方嘉柏成績止跌回升，霍利時打破近月悶局等等，都係幾好嘅例子。而當中不可不提李易達馬房，佢亦係當中表表者。

　　目前李廐累積15場頭馬，原來踏入2012年，單單在一月份，已有6場頭馬進帳，當中更有兩次起孖。回看之前幾個月，李廐未試過喺1個月之內，贏多過3場頭馬。忽然會發力，轉運成分唔排除，但與馬房步入攻擊期梗有關連。

　　旺開就旺

　　唔理係操練上有唔同，定係廐內馬匹分利帶挈，總之，旺開又搏得火紅火綠，呢個馬房近日定要高度重視！雖然，今期出兩駒「天寶之威」和「皇仁勁駒」，兵力比較單薄，都唔可以當冇到！

　　頭場「天寶之威」擺明越程博賠率，情況有點似啱啱爆完嘅「乘奔御風」，其實前仗已後追甚勁，只不過再搵場泥地賽隔一隔，而早於季初曾在四班田草1800米輸唔遠，唔係冇踩過線，成冷更要提防。

　　至於第四場嘅「皇仁勁駒」剛剛轉後追跑法，末段如狼似虎撲上，試啱跑法再用柏寶，箭頭繼續對準1200米，點會唔想交代。

Jack