馬主論戰

猪拉多纳

電訊高星落班搏

　　今晚頭場我哋有隻「電訊高星」上陣，呢隻馬已經沉咗一輪，不過今次終於減夠分可以落五班上陣，對手比以往弱得多，用番贏馬拍檔柏寶操刀，話唔定會有驚喜表現，冷冷哋有得諗。

　　另外推介第二場「綠色快駒」，上場響谷草1000米一出即勝，反映質素高之餘，跑窄場亦好耍家，今次繼續跑番贏馬路程，同場對手亦唔見得太強，要連捷話都冇咁易，值得捧場。

張敬山

都靈一號繼續贏

　　韋達剛啱中三元兼捧盃，手風咁順，點可以唔吼佢啲馬？推介第三場「雪山神駒」，近兩仗跑谷草一哩非冠即亞，八歲馬難得回勇，肯定用得就用，一於吼實。

　　另外鍾意第四場「都靈一號」，上場響泥地贏得好出色，上番四班作賽唔一定冇得爭，早已經證明過谷草性能之馬，今次難得以後備身份補上，仲配埋個韋達上去，有齊晒連捷條件，不容忽視。

任達華

金紫荊施冷箭

　　徐雨石今晚手馬幾惡，博冷可考慮「金紫荊」，依家評分比上季贏馬時低咗11分，計落已有一定反彈空間，有前速嘅馬排十二檔亦影響唔大，有賠率不容錯過。

　　另外要留意尾場「福到威威」，上場初出沿途走外叠，返嚟其實唔係輸好遠，熱身之後隨時有好表現，話唔定會殺個措手不及，如果臨場有賠率更加博得過。

寇鴻萍、梁廷鏘