連贏五日旺勢持續 方嘉柏天天派糖

猪拉多纳

　　近日方嘉柏成績扭轉了，已經連續5個賽日有馬贏，可謂旺勢持續。咁之前點解會停滯不前？兵力不足嗎？應該唔成立。部分馬進入回氣期？又應該冇咁早！所以，未必搵到原因，但轉捩點可能係「金鑛龍華」，呢匹之前搏極唔贏之馬，最終喺1月中打破處子之身，往後方仔就期期W，其實，未贏呢匹馬之前，方廐有成1個月未發過市了。

　　依家行緊運，點都會比之前順番晒，至於有冇本事六連勝？好視乎今日「天久」及「薄荷糖」嘅表現嘞。雖然，其他出賽馬唔係冇機會帶挈方仔，秤落「生利多」、「寶樹嘉盈」等等，又真係次啲啩？！

　　「天久」貴為今屆短途錦標盟主，1200米肯定比直路賽性能好好多，上次對住同一批馬，就話因為路程未跑過，先至會畀人「恰」到，但呢場返回此程，形勢弱轉強，仲唔到佢話事。

　　而「薄荷糖」算係好叻仔，初次跑三班賽就贏，險勝「太平星」唔見得水準唔好，因蹄下敗將季內已在1600米取兩W，印證前駒在三班嘅級數唔嘢小。呢場矛頭繼續對準勝途，應會搏得就搏。

Jack