明海光輝轉倉即拼

猪拉多纳

　　對上一次日賽，大摩馬房梅開二度，何澤堯騎「馬風雲」爆31倍巨冷，勞愛德則熱食「小宇宙」，還有「新力勁」及「花月春風」跑入位置。或有人認為，白德民當時正值停賽，錯失機會與人無尤，但剛戰配主帥上陣的「飛闖」、「馬運來」和「站站名牌」俱輸得無影無蹤，又點解釋？

　　當然，賭博士不敢胡亂揣測摩、白二人之關係，但事實擺在眼前，近期白德民的摩廐坐騎戰績平平，往往有份跑、冇份贏。既然大摩重用外人，如果我是白德民，唯一辦法是有樣學樣，向外搵食謀出路。

　　明日列陣第二場四班泥地1200米的「明海光輝」，原本出自大摩馬房，過往曾在同程兩度上名，性能毋庸置疑，如今落入沈集成手上，後者與白德民季內有如糖黐豆，說不定又能憑此駒擦出火花。早前白德民已替「明海光輝」試勻大細閘，今次即報爭合適路程，應非熱身性質，隨時可在此建功。

　　另外，出爭第五場四班1400米的「多利皇」，上仗配韋達在同程搏輸，今場騎者替同場「幸運來」效力，是自願？抑或冇得揀？先別管箇中原因，總之白德民冷手執個熱煎堆，肯定拼盡求顯身價。

賭博士