牛精威旺五班出招

猪拉多纳

　　跑馬唔可以唔信盤路，條「路」係咁，唔到大家唔服，好多時每逢周末跑馬，好似簽咗合同會爆冷一樣，遠嘅唔好講，單係對上兩期周末賽事，過千蚊冷Q已經跑出好多條！所以，鍾意吼冷門馬嘅馬友，今日正合時宜，一於小注博大堆，隨時有意外收穫。

　　第一場第五班1800米草地。「牛精威旺」今季跑咗7場，冇一次試過打王牌出賽，卒之喺降五班首仗用嘞，同時，又轉戰未跑過嘅田草1800米，忽然有兩樣嘢唔同咗，係咪睇通形勢嘅部署？！我唔敢講，但至少真係有別於前時。講到隻馬實力，都唔覺係叻，不過，叫做曾經喺四班1600米慢放得殿軍，而預佢今場有咁上下形勢，希望落咗班，可以「蝦」到對手。

　　第七場第三班1000米草地。「跑寶貝跑」可能係全日最熱之馬，但又真係冇得拗，睇佢兩勝姿態，完全係玩敵性質，根本冇點用過力，1場接1場好似晨操咁輕鬆返嚟，實力深不可測。目前仍然留在三班，都唔知搵咩馬可以抗衡到佢，雖然，隻馬加分多、負磅重，唔係冇危機，但如果唔係突然演出走樣，今場贏面九成九。

　　第八場第三班1200米泥地。「馬之王」今季演出復現本色，跑3場冇W有Q，有番前季能力之餘，仲好似再叻啲，有可能係搞番掂健康之後，真正能力到依家先至完全釋放出嚟。今仗轉用細路仔，負磅少咗，而主要對手多數排位唔好，如果畀佢5檔順利搶出，有力帶到。

資深評馬人　陳華棟