安全意识好重要

猪拉多纳

　　早前曾经写过关於纪仁安「批踭」事件，马会零容忍，罚得有理，事关骑师阵上操守好重要，安全意识更是重要一环。及至日前不幸发生两宗堕马事件，虽然，镜头惊险，尤其何泽尧尾场嗰宗，好彩两位骑师吉人天相，受伤程度唔算好严重。

　　姑勿论边个骑师出错，引致堕马意外，唔相信会有骑师係蓄意咁做，大家係同行，未至於如敌国。再者，彼此都知道跑马何止叁分险，一个唔好彩「落楼」，真係可大可小，轻则擦损手脚，重则生命受威胁，佢哋又点会冇恻隐之心。所以，唔应该太过责怪边个要负全责。被判停赛或其他相关刑罚，某程度上，佢哋已经受到惩罚了。

　　所有嘢应该向前看，最紧要避免呢类事件再发生，将可能性减到最低，对於阵上安全，马会必须重覆又重覆提醒骑师们，喺竞争与安全之间，必须攞到平衡，唔应该喺比赛时唔顾及他人安危。

　　其实，当年马会限制谷草出马上限12驹，大大减低喺窄场嘅意外，冇记错的话，沙田唔用D栏亦係有咁嘅原因。回头睇番，马会喺呢方面做得幾好，唔係冇顾及阵上安全问题，亦有前瞻性，防患於未然。

马会赛马节目主持 洪礼贤