利钱伯爵唔简单

猪拉多纳

　　今日沙田赛事，有部分场次真係谂到头都爆，但唔係话阿栋自己一度唔掂，就硬要指嗰啲场次出冷居多，而係大家细心望望有幾场赛事，根本係冇隻值得热捧，部分有飞嘅马，好似係夹硬热起上嚟，呢类场合正式係投X陷阱，回报未必高，却有极大风险。

　　第叁场第叁班1000米。「龟兔竞跑」初出入Q，输半个身位畀「名舵主」，之後两场继续跑直路赛，交出1冠1亚，赛绩既稳定，亦持续有进步。始终上场係四升叁班首战，跑第二已本事，事关头马「跑宝贝跑」应该係準一班马！今仗望清楚呢批对手，有边隻係近绩好？真係唔多觉！如果佢自己保持水準，坐位望赢。

　　第九场第叁班1200米。「礼尚往来」上季四出四捷，可惜今季连Q都未入过，进度徘徊？评分饱和？唔知係边瓣？！不过，以佢季初曾负於「甜将」一乘得殿军赛绩，又冇理由喺呢个分数行人止步。总之，上赛加配备之後，立即跑到入叁甲，可能试啱咗，又肯安排返回最有根据路程，如果13档唔係令佢早段喺大外叠太蚀位，今仗有得争。

　　第十场第二班1400米。「利钱伯爵」初出有飞，捧到唔够5倍W，睇飞数唔係讲笑，睇嚟係因为吹晒「风」，但最终连位置都冇，係咪一厢情願？！我又唔觉得係，因为隻马落场跑仲係幾嫩，唔多受控情况下，仍可後上跑得接近。只要今仗进步多少，其实已有赢面。

资深评马人 陈华栋