吉利大师清风送爽搏得分光辉出击

猪拉多纳

　　之前3期谷草A栏赛事，好多头马都係得幾倍，但大热门真係赢得好少，24场W之中，只得两匹係大热门身份。

　　另外，根据最近赛道形势，无疑係大利内档马，1000米或一哩，甚至长途都係咁，呢点要留意。

　　「妙不可言」近两场完全係两隻马，阵中取位及处理手法，好影响到佢发挥，今场有1档，唔应该又喺外叠跑到错晒。只要进度稍好，以佢前仗係咁意追吓就有第四嘅能力，此程会仲好衝。

　　「皇仁劲驹」好靠档位及赛事处境，前仗跑到啱晒，就有本事返嚟输少少，希望今仗排3档，唔似上赛二叠冇遮挡，如留放做得好，直路实会有份衝。「多多昇」四班渐渐企稳阵脚，惜骑练前季起，八字已经唔多夹（22次合作得两季），冷门先考虑。

　　「神童」及「超晒班」最近都係靠慢放先会喺前列过终点，除非今晚利放，唔係限争位置。「利骏」输完顺势休战，储够新鲜感跑番此程，或有番季初首仗效果。

　　

　　「胜利福星」级数比好多对手高，可惜脾性唔可靠，时有慢闸及发忟憎问题，如果正常发挥，又唔係前中段慢到冇得追，会有叁甲。

　　「勇先生」及「横亨」，跑到此程要靠悭及赚跑法先得。「得运欢笑」唔易估边场，亦渐渐失晒信心。「天鹰」跑至第4场，上番大长途，方向正确，至於郁唔郁手就要睇「胃口」。「天翼」长途性能，大幅加程和加眼罩，安排啱数。

　　

　　「好好运」再遇「威水福星」，论处境，彼此俱有不利，但如前驹早段楔得好，直路又有得爆，後驹不易反先。

　　「八佰匹」均速马跑谷草比田草合适，希望跑法肯进取，便可发挥到入位时水準。「怡情养胜」近两仗跑得接近嘅赛事级数，摆喺今场唔係冇得赚，转场或会受益。

　　

　　「可爱人生」靠锐返到叁班都唔怕，情况如上季一样，话晒当时仲赢到「欢欣满载」，今仗磅位大减，或可再捷。

　　「马主光辉」排档好番，留放会唔同，直接提升竞争力。「喜威宝」喺盲门1400米输唔远，兼且拍住翌仗补中的「马风雲」压线，大有跟进价值，而今场转场、加程及换人，有心想搏。「多綵」加程係咪比一哩合适，其实博博吓。「进攻足球」叁班长期赢唔到，却经常有奖金，配脚可拖。

　　

　　「蓬莱仙子」隔两个月复出，準备冇停过，对準谷草一哩目标清晰，按前仗赢马前快後快表现（季内同程第二快），今场唔係乱放，有权放到。

　　「邦先生」往绩準，但亦代表付出唔少体力，唔易一直维持；反而，上赛同场「皇龙战驹」，赛事中表现比预期理想。「金鎸龙华」唔知咩事跑唔番，转配件睇吓帮幾多。「多采多姿」重戴眼罩及负磅减，分数亦贴近季初，希望执正埋跑法，有权变身。「靓到爆」纯粹博轻磅鬥爆一段，冇班亦可能会接近。

　　

　　「高一线」早有转此程打算（1月退出前曾报跑），唔係贸然而来。根据季初赢马水準，目前分数仍未到顶，尤其在谷草，对手次一皮，如一哩适应到，直路鬥衝一定唔蚀底。

　　「玉峡生辉」有可能会继续赚到慢步速，不过，老马唔知仲顶唔顶得住。「超群名驹」做啱留放，会交出一段幾强後劲，倘有前仗追势，有机会入围。「盖世子牙」及「劲飞扬」评分稍为吃力，争P居多。「喜惑」叁班冇试过甩Q，但重磅及12档，唔易克服。

　　

　　「吉利大师」及「清风送爽」，俱为此程专家，喺叁班同样有地位和实力，头马应在其中。

　　「帝豪骏驹」向来唔怕外档，只係担心今场多马走，早段用多咗。「享耆成」及「劲有盈」外档唔易跑，要视乎早段泊到咩位。「搏得分」和「光辉出击」，档好而形势受惠，具边线机会。

　　

　　「高风格」大前仗此程上名所负较远，不过，对手比今仗强得多，应该够用。「红旗勇将」1月曾停过课，希望影响不大，计本身条件，负轻磅唔会好下风。

　　「飞闯」上赛跟啱位，但直路毫无走势，大失所望。「威威多星」前仗赢得靓，刚赛则输意外，回到主项随时返嚟。「美猴王」加眼罩係变数，却不代表一定得，有赔率至博。

马会赛马节目主持 洪礼贤