安國倫又爆森淼獵鷹

猪拉多纳

澳洲年輕好手安國倫自從做咗老竇後，似乎同冷門馬特別有緣，早排先喺泥地夜戰爆咗隻62倍冷W「馬到功成」。輪到尋日沙田賽事，安國倫繼續帶畀馬迷驚喜，喺第五場靠薛達志嗰隻「森淼獵鷹」建功，獨贏派$525。翻查資料，原來安國倫近四W「高風格」、「勁辣椒」、「馬到功成」同埋「森淼獵鷹」都係卅倍或以上，化身冷殺手。
       
森淼獵鷹中檔竄上一攻而破。
近四W隻隻大冷

雖然「森淼獵鷹」今鋪爆大冷W，但係薛達志賽後講笑咁話着灰色西裝加淺藍色呔入場，特登襯番呢隻馬件綵衣，希望可以帶嚟運氣，結果真係建功。光頭志話其實「森淼獵鷹」表現不嬲都好忠心，之前兩仗都係輸畀啲好強對手，今次安國倫走位機警率先發力贏馬，值得一讚。至於加分後嘅部署，佢就話肯定冇咁大優勢，但呢隻馬一向都好穩定，會嘗試繼續出擊，如果唔夠跑就等落番四班再嚟過。