李寶利起孖大翻身

猪拉多纳

挾意大利冠軍之名來港擔任公司騎師嘅李寶利，唔少人都對佢期望好高，點知跑咗個半月成績都係麻麻，早前更因策騎「電訊高星」犯規被罰，好彩尋日停賽前夕大打身價波，夥拍14倍冷門「尚駿心」贏出第五場四班1000米，取得個人在港第一Ｗ，最估唔到佢殺得性起，到第七場再以「美的人生」爆出36倍Ｗ，成功起孖，若果買中呢口獨贏過關2串1，派成五千幾蚊，真係來個大翻身！
       
李寶利憑尚駿心取得在港首捷，大嗌吐烏氣！
女皇盃夥拍統治地位

李寶利同「尚駿心」都算幾有緣，事關佢來港第一匹坐騎就係呢隻馬，賽後胡森都要讚吓呢位意國冠軍，沿途令到「尚駿心」跑得好舒服，同時又要多謝馬主夠耐性，畀足時間慢慢部署，今次先至可以贏得咁順利。值得一提，本月底上演的國際一級賽女皇盃，李寶利已有着落，將會夥拍日本馬「統治地位」爭標，人馬曾喺當地攻下二級賽，且看稍後在港重逢，能否再獲佳績。