今期坐骑多兼有实力 柏宝係时候振作

猪拉多纳

　　柏宝时不时令到捧场客失望，今季已是司空见惯，大热门马在他手上搏失，或是无影无踪，完全唔係新闻 ！ 譬如刚赛捧至两倍唔够嘅「永顺益」，跑个梗头四返嚟。再之前仲有一批大热门「精唛」、「雄姿俪影」、「同个世界」，全数跑至三甲不入，不过，佢又唔係完全唔识赢大热门，「胜利福星」亦係以大热身份胜出，当然，呢类例子真係少之又少。

　　阿Jack在此框框讲过好多次，柏宝今季成绩已经唔算好，严格来说，以手上兵力与成绩嚟秤，其实係唔及格。所以，幾时先识振作，挽回昔日勇将风采，真係对马迷有莫大关连。期望佢或似今日天气，雨後见阳光，拨开晒雲雾。

　　今期赛事佢算係坐骑多，而且有实力，千祈唔好係希望愈大，失望愈大！事关佢隔晚热门坐骑幾多，差唔多匹匹有飞垫底。依个人看法，比较可靠应该係「信心十足」、「甜将」及「包装博士」。前驹初出即胜，实力唔简单，唯一考虑係缺课後有幾大影响。「甜将」直路赛入Q算本事，回到最强路程1200米，或可反先强敌。而「包装博士」连搏两场冇W有Q，4岁马处上升轨道，未必会停手住。

Jack