敬而远之 避免损失

猪拉多纳

　　快活谷赛事有时幾棘手，有冇步速已经係一大难题！好似周中夜赛，当晚有三两场赛事，全场搵唔到一匹放头马，就算赛前点画图、幻想，假定成场走位会点走点走，最终未必与事实相符，如果事前计错数，预测赛果便有误差，中彩机会大大降低。

　　步速快慢影响赛果

　　赛事步速快与慢，已经对赛果有着极大影响，而骑师比赛时醒唔醒目，更加係关键所在。先别考虑跑法问题，假设某驹跑法比较弹性，摆前走又得，守好位又得，若遇上谷草步速慢场合，某驹排埋内档，本有条件置前，奈何鞍上人唔够进取、唔识执生，早段按本子办事，硬要守在中间位置，既失先机，亦冇充分利用档位带来嘅优势。

　　个人从来唔会指责骑师手法存在阴暗面，就算如上述例子，最多认为手法係「专业业馀化」，又或者怪自己眼拙，「有眼无珠」咁锺意咗隻马！

　　不过，人类有时比较矛盾，呢头怪眼光未够好，自怨自艾，但又抵唔住颈，会谂清楚係咪完全唔关自己IQ问题，一於推晒落骑师身上，好等自己哭马丧之时，心理好过啲！虽然呢种「瞬间转移」嘅思潮变化唔係错，却未够实际及善後。倒不如认清那些「专业业馀化」骑师，做到「敬而远之」，以零支持避免损失。

马会赛马节目主持 洪礼贤