红山茶上仗意外多多

猪拉多纳

　　回头看，爱错了吗？是梦一场，抑或自作多情？当局者迷，那刻唔清醒、一时糊塗、被蒙蔽，冇话对与错，事後当上了宝贵一课，尽量避免重覆犯错，令到伤口愈合前咪再受创，旧疤痕与新伤口唔好在太短时间「接力」，好等心理重整後再来。

　　坦白说，玩马幾难逃避爱错！明明B驹今场受到热烈捧场，可惜3倍大热门冚旗收场，睇落好似错爱一场，想同隻马鬥命长？！如果下仗仲买，疑似带着意气用事态度对待，但独立思考，赛事一场还一场，上仗热门唔得，又唔代表今仗命运如一。

　　正如「红山茶」，上场大热门跑梗颈四，今场换人再跑，赔率4倍未必有，又一次成热，够胆奉陪吗？若果睇上赛走势，好大程度係前段泊唔到好位，焗住早望空及发力，加上末段梁家俊被对手打甩条鞭，夹夹埋埋先至会冇P。当然，今仗8档有冇好际遇，其实一样冇得写包单。

　　沈廐热倒马再出30%入

　　至於沈集成马房，今季曾有19驹被捧成大热跑至三甲不入，翌仗再出暂有14驹，成绩为1冠3亚，入Q率接近3成，百分点唔算低，希望「红山茶」跑完唔係归纳失败嗰7成裏面。

　　马会赛马节目主持 洪礼贤