賴維銘無磅減照贏

猪拉多纳

華將減磅制今季改咗新措施，兩個累積咗超過250W嘅資深本地薑賴維銘同埋鄭雨滇，都無咗減兩磅嘅優勢。不過，呢兩個華將果然生性，賴仔就靠「足智多謀」贏馬，而阿滇就贏隻「活力飛駒」，佢哋用行動證明無磅減都一樣有馬贏。
       
足智多謀（中）力壓印度光輝（右）及電訊至尊（左），賴維銘騎得精彩。

目前資歷最長嘅賴維銘，上季只係得13場頭馬，成績就唔係突出。不過，賴仔今季果然爭氣，尋日開鑼竟靠姚本輝嘅「足智多謀」開齋，亦係呢對騎練繼2010年3月21日嘅「千江映月」後，再次攜手建功。
       
賴維銘
輝哥換人足智多謀

輝哥賽後就話既然「足智多謀」上季搏嚟搏去都贏唔到，今次索性搵賴維銘轉吓手風，結果換人得手，佢話唔介意賴仔無兩磅減，今季都會繼續畀馬支持佢。